您所在的位置: 主页 > 体育赛事 >电话骗案日日新 最怕春风吹又生 >

电话骗案日日新 最怕春风吹又生

呢,数字冇花冇假,警方接获假冒内地官员嘅电话骗案持续增加,由一四年只有二十三宗,大幅飙升六十倍至旧年嘅一千四百二十三宗,净係旧年七月就有一千宗,问你怕未。虽然之后稍为回落,但随着骗徒微调犯案手法,最近又掉头上升,今年至今已经有五十多名市民中招,涉及款项高达七千七百万元,其中元朗一名「隐世富豪」更加被骗五千八百万元,创同类案件损失金额新高,都咪话唔夸张。

骗徒到底有咩新招?其实无非又係新瓶旧酒啫。佢哋会先联络受害人讹称对方邮包藏有违禁品,再以更改来电号码嘅程式,假扮内地官方号码骗取受害人信任。骗徒之后又会假扮检察官致电事主,声称可以帮佢哋进行特快查办证明清白,并要求对方按指示提交保证金及下载钓鱼程式,然后喺网上调走受害人资产。

其实,电话骗案唔係今时今日至有,假扮内地官员更加係常见嘅招数,最特别嘅係诈骗集团分工愈来愈精细,组织愈来愈严谨,手法愈来愈先进,由以往最简单嘅「打盲毛」式电话行骗,进化到今时今日发短讯、用网络电话改号以至盗取微信帐号等,五花八门。咪以为只有普通市民受骗,社会名流一样无法幸免,试过有二胡大师夫妇被骗二千万元;又有全国政协委员怀疑手机被勾线,骗徒假扮当事人致电多名全国政协委员,讹称喺内地出事急需一笔钱「营救」,结果真係有人上当。

话时话,近年电话骗案早已广为报道,政府仲成日宣传「时刻保持精明,骗徒无所遁形」,点解仲不断有人中招呢?原因好简单,道高一尺、魔高一丈,市民精明骗徒更加精明,尤其係今时今日中港交流日益频繁,不法之徒事先做足功课,讲得出受害人身份背景,更令人防不胜防。

当然喇,万骗不离其宗,虽然骗徒手法花样多多,但来来去去都係嗰几招啫,唔係威逼利诱,就係利用事主贪小便宜嘅心理。所以话,市民只要提高警觉,保持冷静,时刻谨记「便宜莫贪」嘅教训,骗徒自然无所施其技。

讲到底,要杜绝电话骗案,市民固然要打醒十二分精神,官僚一样唔可以瞌眼瞓,除咗加强同境外执法部门合作,从源头堵截骗案,亦要追上科技发展,提升装备,否则只会野火烧不尽,春风吹又生,香港迟早沦为骗案之都嘅咋!

上一篇:
下一篇: